點解香港係你買中藥最好嘅地方

香港係個國際大都會,多數市民生活上都有濃厚嘅廣東文化。無論喺廚房定診所,香港人都會用上好多草藥,從而發展成世界上最蓬勃嘅中草藥市場之一。

喺1997年香港由英國主權移交畀中國之前,香港人已經係會進口成千上萬噸計嘅草藥,而且唔止由中國入口,係來自世界各地。香港出名在佢擁有全世界最大嘅花旗參市場。

香港有好成熟嘅中藥製造同批發產業。根據政府數據,喺2017年,有10310人從事呢個行業,產生嘅附加價值高達53億港元。喺2018年,香港入口咗39億元嘅中草藥,出口就達到12億元。

你可能會以為中國大陸係呢個產業最大嘅買家同賣家。錯喇。其實香港人好擅長同全世界做生意。用金額去計,多數嘅中藥(32.8%)都係由北美洲入口,當地就係花旗參嘅產地。另一邊廂,香港超過六成嘅草藥都出口到台灣、韓國、越南到美國,呢啲地方都有成熟嘅中成藥製造業。

點解會揀香港?

如果你喺其他地方買過草藥,你就會知道喺香港係更加容易買到又平又靚嘅草藥。

語言人才

香港曾經係喺中國毗鄰嘅英國殖民地,而且有完善嘅教育制度,所以香港人都講到流利嘅廣東話、英文同普通話。呢樣嘢令香港嘅藥師好容易就可以由全世界入口草藥,由其係同海外嘅廣東人同聲同氣,互相幫忙。各地嘅藥商可以好容易咁同香港嘅藥師溝通,攞到佢哋要嘅嘢。

而且,中國大陸嘅人寫開簡體字,香港人就寫開正體字。咁就令到香港人可以讀到古文,從而學習漢醫古籍。中英通曉,令到香港人無論本草典籍抑或現代醫學都可以應用自如。

誠信經商

誠信係商業世界,由其係廣東人經商最睇重嘅嘢。香港有好多可靠嘅中藥老字號,經營藥業甚至超過百年。喺爾虞我詐、假藥遍地嘅中草藥市場,搵到可信嘅供應商至為重要。

成件事唔係淨係靠自律。香港法例第549章《中醫藥條例》規定香港所有批發、零售同中醫師都需要註冊,並且受過專業訓練同埋有相關經驗。條例亦附設列表,規定有邊啲藥材要由註冊嘅供應商先可以賣。

草藥文化應用多

如果你喺香港街上周圍行下,你會發現涼茶舖同中醫診所周街都係。草藥文化紮根喺香港市民心中,好多人都習慣每日飲杯涼茶,去捱過香港又熱又濕嘅天氣。

有咁深厚文化,自然就發展咗好多唔同嘅應用。香港人會用大麻嘅種子——火麻仁去煲茶,可以潤腸通便;亦都發明咗各種嘅藥油,用以緩急止痛,舒緩各種不適、病痛。

作為香港嘅專業藥師,我哋同西醫一樣有自己嘅規條同操守。我哋唔單止賣藥,仲會為你嘅草藥產品畀最好嘅建議,因為呢個係身為醫者應有之義。如果你對草藥有咩問題,歡迎搵我哋傾下,我哋好樂意同你分享!